PARI NANUKMAG OG SAKRISTAN

Usa ka pari sa Santander gireklamong nanukmag sa iyang 13-anyos nga sakristan nga anak og polis nga nadestino usab sa lungsod. Ang 13-anyos nga si Manny Kent Regulacion giubanan sa iyang amahan nga si SPO1 Manuel Regulacion nga mitaho sa Santander Police Station human gisukmag ni Rdo. Padre Jovencio Rabosa gumikan kay nasayop sa sugo niadtong Domingo.

Nahitabo ang insidente sa simbahan sa Santander niadtong Domingo, apan gi-report sa amahan ug anak ang insidente didto sa kapolisan niadtong lang Miyerkules.

Si SPO2 Jane Arcillas, women's desk offficer sa Santander mibutyag kagahapon sa Banat News nga maayong pagkatuto sa ubos nga bahin sa ngabil ni Manny Kent human maigo sa kumo ni Padre Rabosa.

Nahitabo ang pagpanukmag dihang si Manny Kent gisugo ni Rabosa nga ipakuha ang Ambahan nga booklet tungod kay mao kini tamdan sa Santos nga Misa. Apan nasayop ang bata ug dili mao ang librong gitunol niini ngadto sa pari.

Tungod sa maong hitabo hilabihang sukoa ni Padre Rabosa ug paghuman sa Misa miingon kini sa bata nga "pasumbaga ko karon" ug gisumbag niini ang bata.

Matud ni Arcillas nga ang biktima wala dayon mosumbong sa iyang ginikanan sa maong hitabo tungod kay nahadlok kini.

Apan gitataw ni Arcillas nga wala hulgaa ni Padre Rabosa ang bata aron dili mosumbong. Nahibulong ang inahan ni Manny Kent nga dili na kini moadto sa simbahan bisan unsaon pa kini og agda nga paadtuon.

Tungod sa kahasol sa biktima nga sigehan siya og agda sa iyang inahan nga moadto sa simbahan, napugos kini sa pagtug-an sa gibuhat sa pari ngadto kaniya.

Si Padre Rabosa sa pakighinabi sa Banat News kagahapon mihimakak sa maong pasangil.

Apan giangkon ni Padre Rabosa nga gisapot siya tungod kay wala magkadimao ang sugo sa bata ug naghuwat na ang mga tawo nga mitambong sa Misa.

Gitataw ni Padre Rabosa nga igo lang niyang giduso ang iyang tudlo ngadto sa nawong sa bata tungod sa iyang sapot.

Si Padre Rabosa midungag nga makig-estorya siya sa ginikanan ni Manny Kent aron mangayo og pasaylo sa iyang gibuhat.