Official seal gigamit sa bastos nga website ipasusi ni Tom

Gitugyan sa kagamhanan sa dakbayan sa Sugbo ngadto sa kapolisan ang pagsusi ug pag-imbestigar sa nadiskubrehan nga paggamit sa opisyal nga seal sa dakbayan sa usa ka website operator nga nagpasundayag og mga hubo nga babaye unya diha sa website dunay background nga official 'seal' sa dakbayan sa Sugbo.

Gi-angkon ni Mayor Tomas Osmeña nga dili siya agresibo nga mogukod niining maong nadiskubrihan nga laing binuang gumikan kay segurado siya nga dili gyud mahitabung motuo ang publiko nga naggikan sa siyudad sa Sugbo ang maong law-ay'ng pasundayag diha sa website.

Nagkanayon si Osmeña nga wala kaayo kini niya ikalarma gumikan kay alang niya wala pa kini moabot sa highest level of urgency sa iyang pagtan-aw.

Giklaro sa mayor nga mangusog gyud unta siya batok niini kun nahitabo pa nga naglambigit kini og child exploitation kun pagpangabuso sa mga kabataan ilabina diha sa website.

Sayo niini, si City Planning Officer Nigel Paul Villarete misuwat ngadto nila ni City Attorney Rodulfo Golez ug konsehal Edgardo Labella, tsirman sa committee on laws aron mohimo og pakisusi sa posibling kasong atubangon sa website operator nga nasakpang migamit sa official seal sa dakbayan sa pasundayag niining law-ay nga talan-awon sa website.