Vendors sa Colon unahon og demolish sa Lunes

Ang tanang mga vendors sa Colon area maoy unahon sa pag-demolish sugod Lunes sa higayon nga masuta nga padayon kining nakahatag og kasamok sa agianan sa publiko.

Si Gerry Marquez , consultant sa Urban Poor sa Cebu City Hall mipatawag og tigum sa mokapin sa 300 ka mga vendors sa sidewalk sa Colon karong Biyernes diha sa mayor’s conference room sa City Hall sa alas 2:00 sa hapon aron pahibaw-on kini nga napupos na ang 15 ka adlaw nga tagal nga gihatag sa maong mga vendors aron boluntaryong i-demolish niini ang mga stalls nga nakasamok sa sidewalk.

Matud ni Marquez dihang nahinabi sa Banat News nga ang lay-out gihatag gikan sa Citom sa tibuok Colon area maoy ilang basihan sa pagpatuman sa demolisyon.

Human sa maong tigum mosugod dayon sila si Marquez og inspeksyon sa tanang mga vendors sa Colon pagka Lunes aron maklaro kun mituman ba kini sa gikasabutan.

Kadtong mga vendors nga wala motuman sa gikasabutan nga paghawan sa sidewalk automatic na kini nga ipa-demolish.

Samtang human unya sa Colon isunod nga susihon nila ni Marquez mao ang tanang mga vendors sa dalan Osmeña Boulevard gikan sa Kapitolyo hangtod sa may Plaza Independencia.

Kining maong mga lugar nalakip kini sa 14 ka mga dapit dinhi sa dakbayan nga girekomendar sa Citom ngadto ni Mayor Tomas Osmeña nga ipa-demolish ang mga vendors nga mi-okupar sa sidewalk ning maong mga lugar nga naka-apektar sa trapiko sa dakbayan.