Mga barongbarong ipa-demolish sa fire

Morekomendar si Cebu City Fire Marshal Supt. Esmael Codilla ngadto ni Mayor Tomas Osmeña nga i-demolish ang tanang mga barong- barong nga nahimutang sa daplin sa dalan sa mga interior portion dinhi sa dakbayan nga makahatag kanila og kahasol sa higayon nga moresponde ug motumaw ang alarma sa sunog.

Ang mga barongbarong ug uban pang matang sa mga ilegal nga estraktura nga gitukod sa interior portion sa Sityo Lawis, Alaska Mambaling maoy usa sa gibasol ni Codilla nga dugay kaayo nilang nasumpo ang dakung sunog sa maong lugar niadtong miaging gabii.

Gibanabana ni Codilla nga miabot og 180 ngadto sa 200 ka mga panimalay ang gihurot og lamoy sa kalayo nga mitala og P1.8 milyones nga danyos.

Ang mga nasunogang pamilya kasamtangang gipahiluna sa sports complex sa barangay nga nahimutang sa Sityo Viking ug sugod kagahapon sa buntag mi-apod-apod na usab og libreng packlunch ang DSWS sa City Hall ngadto sa mga biktima.

Alang niya dili unta makadako ang maong sunog kun hamugaway pa lang ang karsada niini ug walay mga ilegal nga estraktura nga nakahatag kanila og kalisud sa ilang mga fire trucks nga mahutdan og tubig pag-backing aron makahakot og dugang tubig.

Nagsugod ang maong sunog alas 8:45 ug milanat pa og usa ka oras og 10 minutos una nakontrolar ang kalayo nga gipaubos ngadto sa general alarm.

Apan alang kang Codilla taas ra kaayu ang usa ka sunog nga molanat ngadto sa usa ka oras.

Duha ka anggulo ang gitutokan karon sa imbistigasyon sa kabomberohan sa maong sunog nga naggikan sa pinuy-anan ni Macky Brown ug kini mao ang posibling electrical short circuit o tinuyo ang maong sunog.

Tungod niini, tinguha ni Codilla nga makigtagbo ngadto kang Osmeña aron irekomendar ang demolisyon sa mga ilegal nga estraktura nga nakahatag og kasamok sa daplin sa dalan sa mga interior portion dinhi sa dakbayan.

Pipila ka mga lugar nga gitumbok ni Supt. Codilla nga dunay daghang mga illegal nga estraktura ang kadalanan niini mao ang sudlonong bahin sa may barangay Kamputhaw, Tejero, Pasil ug Alaska Mambaling.