Dinamita nabungkag sa lawas

Usa ka mananagat ang namatay human mibuto diha sa iyang lawas ang dinamita nga iyang gigamit sa ilegal nga panagat nga mao usab ang miangol sa kauban niyang mananagat didto sa kadagatan sa Catarman, Cordova sa milabay’ng hapon.

Ang namatay mao si Joseph Suello, hingkod ang panuigon, minyo, samtang ang naangol mao si Germogenes Masbate, 24, pulos mga molupyo ug mananagat sa naasoy’ng lugar.

Base sa imbestigasyon ni PO3 John Vince sa Cordova Police Station nasayran nga si Masbate bisan samaran personal kini nga mitaho sa kapolisan sa Cordova.

Si Masbate pa ang mipahibalo nga ang iyang kauban nga si Suello patay kini dihadiha dayon human kini mabuthi sa hinimo nga dinamita nga ilang gigamit sa pagpanagat sa maong dapit.

Matud pa ni Masbate nga samtang nanagat sila ug nag-inom sa kadagatan sa Catarman, si Suello kalit nga mikuha sa usa ka botelya nga gihimong dinamita ug sa pagduslit niini atol na unta sa paglabay kalit nga mibuto ang dinamita tumong gyud sa tuong dunggan ni Suello hinungdan sa iyang kamatayon.

Gumikan usab sa mga tipaka sa botelya, si Masbate nahiagum usab og ubay-ubay nga samad sa iyang kalawasan.

Hinuon nakahimo pa kini sa pagpadaplin sa ilang gisakyan nga pumpboat sa baybayon sa Catarman ug mitaho sa kapolisan.

Si Suello wala na madala sa tambalanan, samtang si Masbate gidala kini sa Lapu-Lapu District Hospital alang sa pagpaalim sa mga samad nga iyang nahiaguman.