Babaye gipatay sa Duljo

Usa ka wala pa mailhing babaye ang gipatay diha sa sudlonong bahin sa Panaghiusa, Duljo-Fatima ning dakbayan niadtong Lunes sa gabii, ang biktima nakaangkon og samad pinusilan sa nawong.

Ang biktima nga giila lang sa iyang mga higala sa bansag nga 'Tisay' gibana-banang nagpangidaron og 27 anyos ug may patik nga "CKI" diha sa tunga-tungang tudlo sa tuong kamot.

Usa ka wala mailhing lalaking nagsuot og kolor itom nga t-shirt, kasarangan ang panglawas ug nagsuot og dark bullcap ang gitumbok nga mipusil sa biktima.

Sumala pa sa usa ka civilian anti-crime volunteer nga si Venerando Ocampo, nakit-an niya ang biktima ug ang suspek nga nagkuyog paglakaw ug nag-estoryahanay padulong sa sudlunong bahin sa maong dapit dihang kalit lang mibunot og armas ang suspek dayong pusil sa biktima.

Ang biktima bisan naigo na makausa nakadagan pa kini apan giusban og pusil sa suspek hinungdan sa pagkahagba niini.

Usa ka basiyo sa kalibre 9 mm nga bala ang narekober sa Scene of the Crime Operations, sinelas sa biktima, kalo nga kolor pula, ug usa ka tuong sinelas nga kolor itom diha sa crime scene.

Usa ka higala sa biktima nga giilang si Mary Marson nga residente sa maong lugar ang mitug-an sa mga imbestigador nga matag mobisita diha ang biktima motug-an kini nga mogamit kini og iligal nga drugas.

Nagtuo karon ang kapolisan nga posibleng may kalambigitan sa iligal nga drugas ang motibo sa pagpatay sa biktima.