Walo ka ginikanan gikiha sa CH

Walo sa 10 ka mga ginikanan nga gipasakaan og kasong child abuse sa siyudad sa Sugbo tungod sa paggamit sa ilang mga anak nga minor de edad pagpakilimos sa kadalanan gikonbikto sa korte sa maong kaso.

Mao kini gipahibalo ni Konsehal Gerardo "Gerry" Carillo, action officer sa Cebu City Anti Mendicancy Task Force atol sa press conference kagahapon sa buntag sa pagbukas sa tinuig nga selebrasyon sa anti-mendicancy month karong bulana.

Gibutyag ni Carillo nga mas palig-onon nila ang programa kun pagpanakop sa mga tawong magpakilimos ug anha mangatulog sa daplin sa kadalanan dinhi sa dakbayan.

Kini human nasuta sa mga sakop sa task force nga midaghan karun ang mga dayo gikan sa laing lugar nga mga pamilya nga anaa manimuyo ug mag-estambay sa daplin sa kadalanan.

Sa labing uwahing pakisusi, miabot na og 35 ka pamilya anaa karon mangatulog sa daplin sa kadalanan nga giplanohan sa siyudad nga i-relocate o ba kaha tabangan aron makapahimulos sa balik probinsya program aron makapauli sa ilang tagsatagsa ka probinsya.

Gikan niadtong bulan sa Nobyembre sa milabay'ng tuig hangtod karong bulana miabot na og 283 ka mga tawong nagpakilimos sa kadalanan apil na ang mga bata ang nahipos sa maong task force ug kadaghanan niini mga Badjao.

Samtang miabot na og 40 ka tawo ang napasakaan og kaso ug nalandig sa operation second chance ug BBRC tungod sa pagpakilimos diha sa kadalanan.

Gawas niini, dunay 10 ka mga makililimos ang nakapahimulos sa balik probinsya program ug nakapauli na sa ilang probinsya nga gigikanan.