Mga BIN i-sikyu sa CH ok-Gerry

Walay nakitang iregularidad ang pipila ka sakop sa konseho sa dakbayan sa Sugbo niining nakab-ot nga desisyon ni Mayor Tomas Osmeña pagtaktak sa tanang mga blueguards nga nadestino sa City Hall ug gipang-ilisan sa mga sakop sa Barangay Intelligence Network (BIN) sugod kagahapong adlawa.

Gibutyag ni Konsehal Gerardo Carillo nga normal lang nga magdawat og allowance ang maong mga sakop sa BIN nga nadestino sa City Hall og dili regular nga minimum nga suholan tungod kay usa ka boluntaryo ang ilang pagserbisyo.

Gihimong sanglitanan sa konsehal ang pag-hire sa mga barangay og mga tanod nga gigahinan usab og allowance gikan sa panudlanan sa barangay.

Hinuon gibutyag sa konsehal nga gitakda pa nilang hisgutan sa konseho kining maong desisyon sa mayor nga pagdestino og mga sakop sa BIN aron maoy mobantay sa siguridad sa balay lungsod.

Kining maong lakang gipatuman ni Osmeña aron makadaginot og pundo ang dakbayan sa gibayad nga suholan sa kapin sa 100 ka mga blueguards sa Assault Security Agency matag bulan.