Pinay na-missing didto's Lebanon nakaplagan na

Ang dugay nang na-missing nga Cebuana overseas Filipino worker didto sa Lebanon nakita na gyud sa iyang amahan pinaagi sa TV Patrol World.

Pinaagi sa TV Patrol World newscast gikompirmar ni Rustico Lao nga luwas ug naa na sa mga kamot sa embahada sa Pilipinas ang iyang anak nga si Debra Lao Pangan didto sa Lebanon.

"Di gyud ko masayop ako gyud tong anak," miingon si Lao, ang amahan ni Pangan, dihang nakita personal ang iyang anak pinaagi sa nakuhang video sa ABS-CBN Central Visayas. Matud ni Rustico mipasalig na ang OWWA-7 nga matigayon na ang pagpauli sa iyang anak nga si Debra sa labing daling panahon human sa pipila ka buwan nga saad sa employment agency nga maoy mi-recruit sa iyang anak.

Mipadayag gihapon sa iyang kasagmuyo si Rustico sa agency tungod sa iyang pagbayad og P45 mil aron makauli pagbalik ang iyang anak.

Si Richie Nellas sa Migrante-Cebu nagkanayon nga modangop unya sila sa legal nga proseso pinaagi sa pagsang-at og kasong kriminal ug administratiba batok sa Non-stop Placement Agency tungod sa kakuwang sa tabang niini ngadto kang Debra.

Samtang laing nangayo og panabang sa OWWA-7 ang mga paryente ni Aida Erana Nellas kay nagdumili ang iyang Lebanese nga agawon nga makauli kini kun dili makabayad og US$1,500.

Sa Enero ning tuiga pa miabot sa Lebanon si Aida, apan buot na sa iyang pamilya nga papaulion tungod sa nahitabong gubat sa maong nasud. - Ramil V. Ayuman