Gipusil sa agtang namatay

Namatay ang usa ka 26 anyos nga lalaki kinsa gipusil ang agtang niini alas 11 pasado ang takna sa miaging gabii sa gawas sa giabangang panimalay sa sitio Tikyan, Banilad, dakbayan sa Mandaue.

Ang biktima mao si Rogelito Mangubat, 26 anyos, ulitawo ug lumad nga taga dakbayan sa Lapu-Lapu ug temporaryong nagpuyo sa maong dapit.

Si PO2 Jack Rivera sa kapolisan sa Presinto 4 sa Casuntingan Police Station sa maong dakbayan maoy nasayran nga naglingkod lang ang biktima sa gawas sa gipuy-an niini dihang gipusil.

Matud pa ni PO2 Rivera nga usa sa tulo ka wala hiilhing mga tawo ang kalit lang mitumaw ug usa niini ang miibot sa giloklok nga armas ug gipusil sa agtang ang biktima.

Dugang pa ni PO2 Rivera nga human sa maong pagpamusil ang tulo ka wala hiilhing lalaki ang naglumba og panagan pahilayo sa maong dapit ug gibiyaan ang biktima nga nakabsan na sa gininhawa.

Si PO2 Rey Manatad ug PO1 Jake Torres sa nahisgotang presinto ang dali unta nga mihimo og hot pursuit operation apan nakaikyas gayod ang tulo ka wala hiilhing mamumuno sa biktima.