Cybersex gitago sa mga internet café

Magtambayayong ang kagamhanan sa dakbayan sa Sugbo ug kapolisan aron pagsumpo sa nagpadayong kinawatkawat nga operasiyon sa cybersex sa mga nagkalainlaing internet café dinhi sa dakbayan.

Gibutyag ni Dr. Rene Josef Bullecer, tsirman sa City Anti Indecency Board (CAIB) ngadto kang Criminal Investigation & Detection Group 7 Director Supt. Jose Jorge Corpus niadtong miaging semana ug mipasalig kini nga mohimo og subsob nga kampanya ug monitoring sa mga lugar diin gitumbok nga grabe ang pasundayag sa cybersex sa maong mga intenet café ngadto sa ilang mga kustomer.

Gibutyag ni Bullecer nga dunay dili mominos walo ka mga lugar dinhi sa dakbayan ang ilang nakonpirmar nga grabing misiaw ang cybersex diha sulod sa mga internet café.

Ang cybersex usa kini ka matang sa pagpakighilawas sa babaye ug lalaki pinaagi sa modernong teknolohiya sa computer.

Matud ni Bullecer mipasalig si Corpus nga moduso og kumpletong report human sa duha ka semana nga himuon nilang surveilance ngadto sa tanang mga internet café dinhi sa dakbayan.

Ang maong report unya gikan sa CIDG maoy basihan sa CAIB alang sa pag-rekomendar kun kinahanglanon bang ilusad ang operasyon batok ning nahisgutang mga internet café.

Sayo niini, nadiskubrihan sa CAIB nga duna lay 276 ka mga internet café operators dinhi sa dakbayan ang kumpleto sa business permit ug sobra sa 200 sab niini ang ilegal ang operasyon ug walay business permit.

Sayo niini, gikataho nga walay business permit ang internet café nga gipanag-iya ni Konsehal Gerardo Carillo nga nahimutang diha sa may uptown area, apan dihang gisusi sa Banat News ang business permit section nasuta nga kumpleto kini sa business permit.