CH magtukod 2 school building

Ang kagamhanan sa dakbayan sa Sugbo magtukod og duha ka tunghaan alang sa mga tinun-an sa high school sa bukirang barangay sa Toong ingon man sa Kalunasan.

Gigahinan sa dakbayan sa Sugbo og P1.6 milyones ang pagtukod sa duha ka school buildings ug giuyonan na sa konseho sa dakbayan ang program of works and estimate alang sa maong pagatukoron nga proyekto.

Base sa rekord, ang usa ka andana nga upat ka classrooms nga school building alang sa mga tinun-an sa Toong National High School gastohan og P438,000 sa City Hall isip counterpart sa dakbayan sa maong proyekto.

Sa laing bahin, laing P1.2 milyones ang gastuhon sa City Hall alang sa tulo ka andana nga three classroom building sa Oppra Night High School sa Kalunasan.

Ang maong kantidad adto kuhaon gikan sa Local Development Funds sa dakbayan isip abag sa Department of Education nga masulbad ang kakuwang og mga lawak saringan sa mga pampublikong tunghaan dinhi sa dakbayan.

Wala pa hinuon masuta kon kanus-a masugdi pagtukod ang maong mga school buildings.