Army text hotline gisagop sa 78IB

Nisagop na usab ang militar sa text hotline sa pagpakigbatok sa mga rebelde sa kabukiran sa lalawigan sa Sugbo.

Gipahibawo ni Lt.Col. Jesse Alvarez, commanding officer sa 78th Infantry Batallion sa Philippine Army nga nagbase sa midnorth area sa lalawigan sa Sugbo ang ilang text hotline nga mao ang 0927-3440444.

Ang maong numero sa cellphone mahimo usab matawagan sa katawhan kon may ikataho nga kalihukan sa mga rebeldeng komunista.

Ang lakang sa militar dungan usab sa lakang karon sa kapolisan sa lalawigan sa Sugbo sa pagbutang og text hotline sa matag lungsod.

Sunod semana, gikatakda na nga ipang-apod-apod ang mga cellphones ug ipahibawo sa publiko ang mga numero niini sa matag buhatan sa kapolisan sa kalungsuran ug syudad sa tibouk lalawigan sa Sugbo.

Gisagop sa kapolisan ug militar ang maong pamaagi sa pagkuha sa suporta sa katawhan sa pagpakigbatok sa mga rebelde ug kriminalidad human nakita ang ka epektibo niini ilabi na sa pagkuha sa mga impormasyon.

Dungan niini ang pagpalig-on usab sa barangay intelligence network nga maoy direktang koneksiyon sa kapolisan ug militar.

Ang text hotline gitumong usab aron ang bisan kinsa nga sibilyan nga dunay mga kasayuran mahitungod sa kalihukan sa mga rebelde ug kriminalidad ang dali ra usab makataho niini ngadto sa kapolisan ug militar.