Permit sa estasyonan sa radyo hayan makanselar

Ang pagkanselar sa permit sa sibyaanan sa DyHP mao karon ang labing bug-at nga gitun-ang silot nga ipahamtang sa National Telecommunication Commission (NTC-7) gumikan sa pagdumili sa paghatag og kopya sa recorded tape sa matag adlaw nga sibya sa komentarista niining si Joash Dignos.

Kini ang gipadayag ni Bill Peralta sa NTC sa gihimong pagpakighinabi kaniya sa Banat News kagahapon.

Matud pa ni Peralta nga sayop ang pangatarungan sa tagdumala sa DyHP nga paglabay sa pito ka adlaw ila na nga gipapas ang recorded tape sa broadcast ni Dignos.

Giklaro niya nga subay sa memorandum circular sa ilang buhatan nga ang recorded tape sa matag adlaw nga broadcast sa matag sibyaanan nagkinahanglang hangtod pa sa napulo ka adlaw nga gidili niini ang pagpapas.

Si Peralta miingon nga sa una nilang pagpangayo nakahatag pa kanila ang DyHP og kopya sa recorded tape sa broadcast ni Dignos apan sa matag adlaw nilang pagpangayo sa matag broadcast usab niini nagdumili na kini paghatag kanila.

Matud pa ni Peralta nga bisan siya nga nag-monitor sa maong sibya ni Dignos ang gingil-aran gayod sa mga pulong nga gigamit niini nga dili gyod makaayo sa pagpaminaw sa mga bata.

Gipasabot niya nga ang ilang buhatan sa NTC may mga lagda nga gipatuman nga angay gyod sundon sa mga sibyaanan.

Ang pagdumili sa DyHP sa paghatag ngadto kanila sa tape record sa matag adlaw nga sibya ni Dignos maoy tataw kaayong basehanan nga wala na kini mosunod sa mga lagda nga ilang gipatuman.

Giangkon ni Peralta nga ang Kapisanan ng mga Brodkaster ng Pilipinas (KBP) maoy self-regulatory body sa matag estasyonan sa radyo aron sa paglimpyo sa mga sibya sa kahanginan.

Sa nasayran nga si Dignos nga komentarista sa DyHP ang gipasakaan og kasong libelo ni Cheryl Ouano tungod sa pagbalikbalik niini sa kahanginan nga "gi-gerger" sa ugangan niining si Mayor Thadeo Ouano.