Mga tambok ug huyang nga polis may programa

Nunot niining migawas nga balitang dunay kapin 500 ka mga polis nga tambok ug huyang ang panglawas hinungdan nga wala makapasar sa physical fitness test (PFT) sa kapolisan matag semester sa tuig, ang Cebu City Police Office nagplano karon sa pagpahigayon og espesyal nga programa alang sa ilang mga nahagbong nga mga sakop.

Si CCPO director, Supt. Melvin Gayotin mibutyag sa Banat News nga kun madawat na niya ang listahan sa iyang mga sakop nga nahagbong sa PFT iya kining ipabalhin sa Service Security Group.

Gimanduan na ni Gayotin si Sr. Insp. Lourdes Engente, hepe sa administrative branch sa CCPO sa paghimo og plano alang sa usa ka programang motagad sa panglawas sa mga tambok nga mga polis.

Ang maong programa mao ang dietary and exercise program nga diin mokuha og dietician consultant ang CCPO aron mahatagan sila og tambag unsay mga pagkaon nga likayan ug angayang maoy kan-on.

Gumikan usab sa kakulang sa mga tawo, ang ubang mga polis sa SSG nga himsog ang lawas maoy ibaylo sa mga polis nga nahagbong.

Si Chief Supt. Silverio Alarcio, ang direktor sa Police Regional Office 7 sa pakighinabi sa Banat News mibutyag nga kun dili makapasar ang maong mga polis sa tulo ka semester nga ihatag kanila aron magpakabaskog iyang iparekomendar nga taktakon sila sa serbisyo.

Matud pang Alarcio nga ang pagka-physically unfit sa usa ka polis usa kini ka lig-ong basehan aron ma-"attrited" kini gikan sa serbisyo.

Giklaro ni Alarcio nga ipaagi kini sa legal nga proseso gumikan kay dunay proseso nga maoy mohikay sa mga susamang mga kaso.

Gipahinumduman ni Alarcio ang tanang mga polis nga sugod sa ilang pag-aplay hangtud nga sila moretiro ang usa ka polis angayang himsog sanglit wala magpasabot nga nakasulod na sila sa organisasyon mag-relaks ug magpabaya na sila sa ilang lawas.