Bomb detection diha sa CH

Ipaubos sa subsob nga seminar alang sa pag-ila ug pagsumpo sa mga hulga nga pagpamomba ang tanang mga kawani sa kagamhanan sa dakbayan sa Sugbo.

Si City Administrator Francisco Fernandez miluwat og direktiba ngadto sa tanang mga kawani sa dakbayan niadtong Hulyo 10 nga nagpahibawo sa pagahimuong "bomb detection exercise" ngadto sa tanang mga kawani sa dakbayan.

Pormal nga gisugdan ang maong seminar niadtong Hulyo 14 niining bulana ngadto sa lainlaing departamento sa City Hall ug pormal nga mapupos Agosto 1.

Ang mga sakop sa Bomb Disposal Unit sa SWAT pinangulohan ni Chief Insp. Arnel Banzon, PO3 Danilo Rosales ug PO3 Jun Lerio maoy gitahasan sa nagpadayon karon nga seminar nga tipik ug kabahin sa mga pagpangandam nunot ning nagsingabot nga ASEAN Summit sa Disyembre.

Giklaro ni PO3 Lerio nga dili lang ang mga kawani sa siyudad ang ilang gipaubos sa maong seminar kun dili lakip na kadtong mga pribadong establisamento.

Gibutyag ni PO3 Lerio dihang nahinabi sa Banat News nga duna nay 30 ka mga pribadong establisamento nga nagpahigayonan sa maong seminar nga libre.

Iyang giawhag ang uban pang mga pribadong establisamento nga gustong mapaubos sa seminar sa bomb detection ang mga kawani niini sa pagpakig-alayon lang sa Cebu City Police Office (CCPO).