Tulisan giunay og patay sa kauban

Namatay ang usa ka wala mailhing lalaki human kini gipusil sa kauban niining tulisan human sila nakabiktima og usa ka taxi driver sa miaging tungang gabii diha sa Lawaan Talisay.

Si Elpidio Alsola Bucao, Jr. hingkod, nagmaneho sa taxi nga Megume nagtangag sa plaka GWF 227.

Segun pa sa biktima nga misakay kaniya ang duha ka wala mailhing mga lalaki nianang alas 12 sa tungang gabii diha sa Mabolo ning dakbayan ug nagpahatod sa Camella Homes Lawaan Talisay.

Pag-abot sa maong lugar kalit mideklarar og tulis ang usa sa duha ka hold-upper dayong tion sa armas ngadto sa biktima.

Dugang pa ni Bucao nga gipulihan siya sa pagmaneho, dungan sa pagmando nga pahigdaon lang sa backseat.

Samtang nagdagan ang taksi nga gimaneho sa usa, gitionan usab siya og armas sa kauban niini diha sa luyo.

Iyang namatikdan nga naabot sila sa Mohon sa may eskina, apan kalit lang napawong ang makina sa taksi.

Nakahukom ang usa sa duha ka hold-upper nga kuhaon nalang ang iyang sterio sa sakyanan, hinungdan nga nakahigayon siya sa pagdagan palayo sa maong lugar.

Nangayo og panabang ang biktima sa mga estambay sa maong lugar.

Si SPO1 Romeo Barde sa Minglanilla sa pakighinabi sa Banat News mitug-an nga positibong giila sa biktima ang napusilan patay nga maoy mi- hold up kaniya diha sa Lawaan ug gikuha ang usa ka libo nga kuwarta.

"Ang usa ani nga kauban niingon man nga moadto sila sa Naga, unya kalit man namatay ang makina sa taksi. Mao to nga nakahigayon og dagan ang drayber".

Matud ni SPO1 Barde nga dunay nadunggan ang mga residente nga sipang buto sa armas.

Nakit-an na lang kini nga patay na, wala gayud ta ka seguro ug katong mga estambay ba ang nipusil ani o giunay ra sa iyang kauban.

Gibanabana nga 30 ngadto sa 40 anyos ang pangidaron, 5'4'' ang gitas-on, normal ang pamanit, kasarangan ang lawas, nagsul-ob kini og short nga maong ug itom nga T-shirt.