Hupas nga bakuna susihon sa Ombuds

Ang nahitabong pagkahupas lang sa kapin sa tulo ka milyon ka pesos nga mga bakuna ug lain pang daghang mga tambal nga alang sa katawhan dinhi sa Central Visayas giimbistigahan na apan gituohan nga malangan gihapon ang sangpotanan sa imbestigasyon.

Ang mga nagpakabana nga mga kawani diha sa Department of Health mitug-an nga ang kadagkuan sa Regional Health Office mituman na sa awhag sa Commission on Audit nga susihon ang maong pagkahupas lang sa mga tambal.

Apan gituohan nga ang maong imbestigasyon mahisama lang sa gilusad nga imbistigasyon sa Ombudsman niadtong anomaliya sa VSMMC nga gibiktima sa usa ka sindikato nga nakakobra og kapin sa tulo ka milyon ka pesos human sila nagpatuo nga mga charity patients.

Human mabulgar ang maong anomaliya kaniadtong Agosto sa miaging tuig, ang Visayas Ombudsman mimando dayon og imbistigasyon pinaagi sa pagpatubag ni hospital director Felomina delos Santos, apan hangtod karon wala g'yod mahuman ang maong pakisusi.

Daghan hinuon sa mga opisyal ug kawani sa Regional Health Office mapanagan-on kaayo nga mohatag og pamahayag kabahin sa labing ulahing anomaliya nga nabutyag, diin P3.6 nga kantidad sa mga bakuna ang nahupas lang nga wala magamit diha sa lainlaing health center sa miaging tuig.

Apan dunay uban nga misuway sa pagpasabot nga ang labing una nga mabasol niini mao ang kadagkoan sa DOH kay pagpadala nila sa maong mga bakuna dinhi sa rehiyon, daan na nga hapit na kini mohupas.

Ubos sa kontrata sa DOH ug sa supplier sa maong mga bakuna gilatid nga ang ilang produkto nga ibaligya sa kagamhanan kinahanglang tulo pa ka tuig ang gidugayon sa dili pa kini mohupas.

Apan nahibaw-an nga ang mga bakuna nga nangabot dinhi sa rehiyon, duna na lay kapin sa tuig ang termino sa iyang paghupas.

Ang maong mga bakuna gitagana unta aron isanta sa pagkuyanap sa mga polio ug sa neonatal tetanus sa kabataan, ilabi na kadtong mga bag-o pa nga natawo.