Loot sayo kaayong gisapot

Gisapot sayo kagahapon sa buntag ang hepe sa Cebu Police Provincial Office, Sr. Supt. Vicente Loot, nunot sa awhag sa hunta probinsiyal sa Sugbo sa pagpatuman sa Text-A-Crime program sama sa Cebu City Police Office.

Usa ka resolusyon nga giduso ni Bokal Carmiano Kintanar ang gipasar sa hunta probinsiyal sa sesyon niadtong Lunes tumong sa maong awhag ngadto kang Loot.

Matud pa ni Loot nga una ang CPPO magbutang og cellphones sa mga police stations nga gikatakda na nga ilusad karong Agosto 2 samtang nagplano pa lang ang CCPO.

Giklaro usab ni Loot nga dili niya batasan ang pagkopya sa programa sa uban sanglit may kaugalingon siya nga paningkamot.

Gipakita kagahapon ni Loot ang mga yunit sa cellphones nga andam na ipahimutang sa 51 ka police stations sa lalawigan sa Sugbo.

Pondo gikan sa CPPO ang gigamit sa pagpamalit sa mga cellphones nga dunay regular nga linya ug binuwan nga bayranan sa Smart Communications.

Gihan-ay pa kagahapon ang lagda nga tumanon sa kapolisan sa labot sa paggamit sa maong cellphones diin usab niini ang dili pagdala gawas sa police stations samtang ang hepe sa matag police station ang responsabli sa tanan ingon man sa dugang bayranan matag buwan kon mosobra sa ihatag nga limit.

Lakip sa lagda mao ang paghimo dayun og aksiyon sa mga reklamo nga modangat sa text messages ug ang pag-reply sa reklamante aron ipahibawo nga nadawat na ang reklamo ug himoan na sa tukmang aksiyon.