Biktima sa hit and run, patay

Patay ang usa ka 47- anyos nga lalaki nga nagsakay biseklita human mabiktima sa hit and run nga sakyanan kagahapon sa kaadlawon.

Kini nahitabo ala 1:15 sa kaadlawon diha sa may Canjuntic Bridge sa Matab-ang, Toledo.

Ang biktima giila mao si Alberto Mangubat Borja, nagpuyo sa Sitio Kinner, Poblacion Toledo.

Sigun sa report nga midangat sa Cebu Provincial Police Office, ang biktima sakay sa iyang biseklita gikan sa Proper Matab-ang ug paingon na unta kini mopauli sa ilang panimalay.

Paghidangat sa maong lugar wala makabantay ang biktima nga dunay naghaguros nga sakyanan nga iyang gikasugat.

Ang biktima nga maayong pagkaigo sa sakyanan nalagpot sa iyang biseklitang didto mapunta sa sementadong karsada.

Si Borja nakaangkon og grabeng samad, pangos sa nagkadaiyang parte sa kalawasan hinungdan sa pagkamatay dihadiha.

Human sa pagkaigo sa biktima, ang wala mailhing drayber misutoy kini og padagan biniyaan ang biktima nga nagbuy-od.