Patay'ng bata 'palgan

Usa ka batang lalaki ang napalgan patay sa mga tanod daplin sa dagat diha sa isla sa Caubyan dakbayan sa Lapu-Lapu sa miaging adlaw alas 5:30 sa kahaponon.

Ang mga barangay tanod nga sila si Hermenio Abuno, Policarpio Sabior, Reynaldo Barte ug Roque Inok maoy nakakita sa patay'ng lawas daplin sa dagat.

Gibanabana nga tulo ngadto sa upat ka tuig ang pangidaron, nagsul-ob kini og pink nga short nga dunay marka nga "PINOY".

Ang lawas sa maong bata halos dili na maila, gani bahobaho ang lawas sa bata.

Ang patay'ng lawas anaa karon gidala sa Cebu Rolling Hills Mandaue aron ipaubos sa autopsy.

Hangtod karon wala pa mailhi sa kapulisan sa Lapu-Lapu, hinuon nagpadayon ang ilang gihimo nga imbestigasyon.