Konsehal mihimakak sa pasangil

Konsehal sa Talisay mihimakak sa pasangil nga siya maoy hinungdan sa pagkataktak sa usa ka casual nga kawani sa City Hall tungod kay nakiglalis kini sa iyang umagad.

Si Konsehal Sergio "Serie" Restauro nagkanayon nga ang maong pasangil walay legal nga basehan.

Si Restauro ug Emily Cabrera, Human Resource Management Officer gireklamo og administratiba ni Benjamin Villarante Sr.

Ang maong reklamo giduso ni Villarante diha sa buhatan ni Bise-Mayor Aberdovey Belleza.

Si Villarante mipasangil ni Restauro ug Cabrera nga nakalapas sa Akta Republika 6713 kun "Code of Moral Conduct and Ethical Standard of Government Officials and Employees" ug sa Local Government Code tungod kay gitaktak sa maong mga opisyal ang iyang anak nga si Daver nga walay rason nga gibutang sa memorandum sa hinungdan sa pagkataktak niini.

Ang nahisgutang memorandum nga gipirmahan ni Mayor Socrates Fernandez niadtong petsa onse niining buwana nga adunay approval ni Cabrera nagkanayon nga kutob na lang sa Hulyo 14 ang serbisyo ni Daver ug ang attendance niini nga masulod sa Biometric System nga molapas na sa nahisgutang petsa sa iyang pagkataktak dili na kini malakip sa payroll.

Si Daver nagsugod sa iyang serbisyo niadtong Abril sa milabay'ng tuig.

Dungag nga pasangil ni Villarante nga gihagad ni Restauro og sinukmagay ang iyang anak.

Giangkon ni Restauro nga gihagad niya og sukmagay si Daver tungod kay giinsulto siya niini dihang iya kining gipangutana kabahin sa pagpangihi niini.