Toledo tinguha'g ospital

Ang Toledo City nagkinahanglan og dakong hospital aron sagupon ang mga masakitong dili pa grabeg kahimtang gikan sa nagtubong populasyon niini.

Matud pa ni Toledo City administrator Felomino Plaza Jr. nga bisan sa ilang gidaghanon nga 150,000, nagpabilin gihapon 25 ka katro ang kapasidad sa ilang Toledo City District Hospital karon.

Karong gilaraw ni Gobernador Gwen Garcia nga ipasagop na sa mga tambalanan sa kalungsoran ug siyudad ang ilang mga pasyente, si Plaza nagkanayon nga dako silang uyon niini.

Apan gipaabot nilang makatabang ang gobernador sa ilang gikinahanglang pagpadako sa ilang tambalanan.

Matud pa niya nga sa ilang populasyon karon, gikinahanglan nila ang 50-bed capacity nga ospital ilabi na karong ang mga samaron, manganakay ug ubang sakit nga dili kaayo grabe dili na dawaton sa Vicente Sotto Memorial Medical Center.

Segun sa plano sa gobernador, ang VSMMC himoon nalang tambalanan alang niadtong grabe na kaayong pasyente ilabi na sa mga operahanan nga gitawag og "tertiary" nga kaso sa mga pasyente.

Kini gitumong aron nga dili kaayo mabangkarota ang Department of Health sa ginastohay sa mga pasyente nga bisag noka lang dad-on pa gyud sa taga lungsod diha sa VSMMC ug anha patambali.

Matud pa ni Plaza nga kon adto nalang tambali ang pasyente sa Toledo sa ilang ospital, basta kompleto lang silag kahimanan, mas dili kaayo bun-og ang pasyente kay sa ibiyahe pa siyag usa ug tunga sa oras paingon sa dakbayan sa Sugbo.

Daghan na kaayong mga pasyente nga anha ra kabugtoig ginhawa sa dalan kay gumikan sa kalayo sa biyahe, matud pa ni Plaza.

Busa aron matuman ang gilaraw sa gobernador, mas maayong bundakan og kuwarta sa kagamhanan sa lalawigan ang mga tambalanan sa kalungsuran ug siyudad aron nga makapamapalit kinig kahimanan ug mga tambal.