Belmonte gipasalamatan ni Morales pag-anhi's Cebu

Gipasalamatan ni Customs Commissioner Napoleon Morales si Cebu District Collector Ricardo Belmonte sa pagdawat sa bag-ong pwesto diin sa unang higayun nalayo siya sa iyang pamilya.

Kini atol sa iyang pagpakigpulong human sa flag raising ceremony sa Bureau of Customs sa Sugbo kagahapon bisan iyang giunhan sa pag-angkon nga nasakitan siya sa iyang desisyon nga nakapasakit usab sa iyang kaubanan.

"I can only symphatize with them. I feel the pain, the inconvenience and the frustration," nagkanayun si Morales.

Apan giklaro ni Morales nga gikinahanglan kaayo ang maong desisyon tumong sa pagpalambo sa koleksiyon alang sa kaayuhan sa kadaghanan pinaagi sa mga programa sa gobyerno.

Nagpasalamat si Morales kang Belmonte ingon man kang Collector Maria Lourdes Mangaoang sa gipakita niining propesyonalismo sa trabaho.

Nunot niini gipahimangnoan ni Morales ang ubang opisyal sa BOC sa Sugbo nga ang dili pagsuporta kang Belmonte, ang tanan lang gihapon ang masakripisyo.

Kagahapon si Morales usa sa dinapit sa State of the Nation Address ni Presidente Arroyo.

Gipasabot ni Morales nga ang iyang pagtambong sa SONA nagdala sa tibouk buhatan sa Bureau of Customs ang dungog nga iyang naangkon sa pagtambong sa maong okasyon kadungganan sa tanan.

Nanghinaut si Morales nga dili mohunong ang iyang mga sakop sa pagkolekta sa pondo nga alang sa kagamhanan. - Gregg M. Rubio