Giila ang biktima mao si Anthony Paulin alyas Iwok, 15 anyos, residente sa Sitio Hillside sa samang dapit kinsa gikatahong nasulod na sa bilanggoan kaniadto base sa nakuhang kasayuran sa Homicide Section.
Ang biktima nakaangkon og samad pinusilan diha sa iyang suwang, ulo ug buko-buko gikan sa wala matinong kalibre sa armas de fuego.
Si SPO3 Alex Dacua sa Homicide Section mitug-an sa Banat News nga posibleng giatangan ang biktima diha sa agianan sa mamumuno niini diha sa nahisgutang lugar nga hilit kaayo ug ngitngit atol sa kagabhion.
Sumala pa sa usa sa mga residente sa maong lugar nga si Marian Prieto, 21, nga duna silay nadunggang upat ka buto sa armas gikan sa nahisgutang dapit nianang pagkaalas siyete sa gabii niadtong Domingo.
"Base sa crime scene, nagduda ta nga giatangan ni siya diha sa lugar dayon gidul-itan og pusil," asoy pang Dacua.
Ang biktima gikatahong bag-uhay pa diha magpuyo sa maong lugar sanglit walay nakaila kaayo kaniya, apan giingong gidudahan kining maoy responsable sa pagpangawat sa mga balay sa maong dapit, hinuon sumala pa sa Homicide Section ila pa kining kumpirmahon.
Duha ka anggulo karon ang gisusi sa kapolisan sa posibleng motibo sa pagpatay, posibleng atraso o ba kaha gi-salvage ang biktima tungod kay ang dapit nga gikahitaboan di sagad agian sa mga tawo ug makaduda usab kung diha miagi ang biktima nianang taknaa ug giatangan lang sa mga killer niini.