U.S. Army gipusil patay

Usa ka Amerikano nga gikatahong kanhi sakop sa U.S. Army ang gipusil patay samtang grabeng naangol ang kapuyo niining Pinay diha sa atubangan sa usa ka townhomes sa dalan Banawa, Guadalupe ning dakbayan kagahapon sa udto.

Usa ka bala diha sa ulo nga milapos sa nawong ang naangkong samad sa biktimang si Victor Noe,68, usa ka Amerikano ug samdan usab sa walang tampihak ang kapuyo niining si Catalina Cabanes, 35, kinsa ang duha kasamtangang nagpuyo sa San Agustin Heights, Tisa ning dakbayan.

Sumala pa sa imbestigasyon nila ni SPO3 Alex Dacua ug SPO2 Dennis Moga sa Homicide Section ang mga biktima uban sa duha ka anak nga babaye ni Cabanes mao pay pagkanaog sa taxi nga ilang gisakyan dihang kalit nga giduol sa usa ka lalaking nagsuot og bonnet dayong pusil ngadto sa Amerikano.

Si Cabanes daling mibira sa duha niya ka anak aron tabunan kini apan naigo usab kini diha sa ulo, ang suspek gikatahong daling midagan padulong sa kauban niining nagpaabot sa usa ka motorsiklo nga nag-urong pipila ka metros gikan sa gate sa maong townhomes ug daling miikyas padulong sa dalan Salvador sa Labangon.

Duha ka basiyo sa kalibre 45 nga bala, usa ka slug ug usa ka kolor blue nga bonnet nga gituuhang iya sa gunman ang narekober diha sa crime scene, samtang walay nakitang timailhang gikawatan ang mga biktima sanglit naa pa tanan ang gamit ni Noe nga mahalong cellphone, alahas, relos ug pitaka nga may sulod nga kwarta.

Usa ka concerned citizen nga nakaagi sa maong dapit nga nakakita sa onse anyos ug otso anyos nga mga batang nag-apong sa mga biktima maoy daling mitabang kang Cabanes ug midala sa mga bata sa Chong Hua Hospital.

Nasuta nga ang mga biktima ug mga bata gikan pa nihikay sa papeles sa mga bata sa Department of Foreign Affairs aron sa pagpadala kanila ngadto sa Amerika karong sunod tuig. Ang duha dugay nang nagpuyo-puyo sumala pa sa onse anyos nga anak ni Cabanes nga gikahinabi sa Banat News.

Matud pa sa onse anyos nga anak ni Cabanes nga miadto sila sa maong townhomes aron paghikay sa mga papeles usab sa palitong luna ug balay sa iyang ama-amang si Noe niadtong tungura.

Ang mga bata kagahapon pa sa buntag nangabot gikan sa Pagadian diin sila magdako sa ilang apuhan human magbuwag ang ilang inahan sa ilang amahan.

Nagduda karon si Dacua nga dunay dakong posibilidad nga may kalambigitan ang kaminyuon sa babaye sa maong krimen gumikan kay ning bag-uhay lang giingong na-annul ang kasal niini sa amahan sa otso anyos nga anak ni Cabanes.