Seaman gipangayoag 6-sakong bugas sa 'NPA

Usa ka seaman midangop sa Consolacion Police Station human siya nakadawat og tawag sa telepono sa nagpailang sakop sa New Peoples Army nga nangayo og bugas nga unom ka sako.

Kini nahitabo kagahapon sa buntag sa mga alas 7 ang takna diha sa may V & G Subdivision Nangka, Consolacion.

Si Josephus Seno, 34, minyo usa ka seaman og bag-ohay lang nauli gikan sa gawas sa nasud maoy nakadawat sa tawag sa telepono nga nagmando kaniya nga siya pahatagon og unom ka sako nga bugas humay ug ipahatod sa Tuburan.

Segun sa asoy sa biktima ngadto sa kapolisan nga mius-os ang gipangayo nga bugas ngadto na lang sa tulo ka sako, kun dili P3 mil. kuwarta nga kantidad maoy pangayuon unya ipahatod diha sa may Metaphil building atbang sa Trade School dalan M.J Cuenco Avenue ning dakbayan sa mga alas 8 pasado sa buntag kay dunay tawo nga nagpaabot.

Gihulga pa ang biktima sa nagpailang NPA pinaagi sa telepono kun dili siya makahatag nianang kantidad ilang kidnapon ang anak sa biktima nga si Josh Gabriel.

Gumikan sa kabalaka sa pamilyang Seno, ang amahan niini nga si Paul maoy mikuyog sa iyang anak pagreport sa kapolisan.

Si PO3 Francisco Parilla sa dihang nahinabi sa Banat News nagkanayon nga basin gisakyan lang kini sa mga way lingaw nga mga tawo ug gustong mopahimulos sa higayon.

"Imposible man kaayo nga adto ipahatod ang bugas sa Tuburan kalayo ato".

Apan wala isalikway ni PO3 Parilla ug sa tibuok puwersa sa kapolisan sa Consolacion unsa ka seryoso o dili ang maong report ila gihapon kini himuan og imbestigasyon.

Ang Banat News misuway unta pagkontak sa pamilyang Seno sa pagsulat ning balita kagahapon sa hapon aron makakuhaan og dugang impormasyon, pero pakyas kay walay mitubag sa telepono.