Ginang gitagod-tagod sa iyang silingan

Nabahin-bahin ang lawas sa usa ka ginang human gitagod-tagod sa iyang silingan atubangan sa otso-anyos niyang anak ug sulod mismo sa iyang panimalay sa Sitio Riverside, Hagnaya, San Remegio, niadtong Sabado sa alas 5 sa hapon.

Natagod-tagod ang ulo, bukton ug kalawasan samtang nangaputol-putol pa gyud ang mga kuyamoy sa biktima nga si Lirma Castro, 40, lumolupyo sa naasoy'ng lugar.

Gitumbok sa kapolisan nga maoy mitigbas ug mitagod-tagod og kadaghan ni Castro mao ang iyang silingan nga si Rogelio Rosatasi, hingkod ang panuigon.

Bugtong saksi sa maong hitabo mao ang anak ni Castro nga si Aika, 8, kinsa diha sa kusina nag-apong unta sa iyang inahan nga nagluto sa panihaponon unta nilang pamilya, sa dihang nahitabo ang pagpanigbas.

Si SPO1 Eufrofino Aguisanda, imbestigador sa San Remegio Police Station, miasoy sa Banat News nga brutal kaayo ang kamatayon ni Castro.

Si Rosatasi misulod sa balay sa mga Castro agi sa luyo nga bahin nga nagdala og sundang ug didto sa sulod mitumaw ang mainitong panaglalis. Taliwala sa panaglalis, gihapsan ni Rosatasi og kadaghan si Castro sa dala niining sundang.

"Nakabantay ang biktima sa pagtigbas unya gisagang mao nga nasamad ang duha ka bukton. Midagan ang biktima sa gawas apan gigukod kini ug gitiwasan hangtod namatay," si SPO1 Aguisanda miingon.

Sumala pa sa imbestigasyon nga gipatong ug gidat-ol ni Rosatasi ang ulo ni Castro ngadto sa usa ka kahoy ug gitagod-tagod sa dala niining sundang.

Ang ulo ni Castro nakaangkon og dagko ug daghang samad sa agtang ug ulo. Dunay mga kuyamoy nga narekober sa kapolisan diha na sa container nga sudlanan og tubig.

Matud pa ni SPO1 Aguisanda nga dugay nang nagkabangi si Castro ug si Rosatasi. Si Rosatasi gipasanginlan ni Castro nga maoy mikuha sa kanding niini ug didto nagsugod ang init nilang panag-away.

Niadtong Hulyo 19, dugang pa ni SPO1 Aguisanda, nga ang anak lalaki ni Castro nga si Rex, 19, kinsa may deperensiya sa pangisip gikulata ni Rosatasi sa walay igong hinungdan.

Si Rosatasi dali nga misibat human sa insidente.