Dako'g koleksyon ang BIR

Mas daku bali og P913-milyones ang nakolekta sa Bureau of Internal Revenue sa rehiyon gikan sa Enero hangtud Hunyo ning tuiga itandi sa susamang mga buwan sa tuig 2005.

Ang BIR sa Sugbo nakakolekta na og P4.262-bilyones sa unang unom ka buwan ning tuiga diin 27.29 porsyento ang pagsaka niini sa niaging tuig.

Gani sa buwan lang sa Hunyo ning tuiga, ang BIR nakakolekta og P649.8-milyones ug mas daku bali og 19.54 porsyento sa buwan sa Hunyo sa tuig 2005.

Gitumbok ni BIR regional director Jaime Santiago ang agresibong kampanya ug pagpasabot mahitungod sa pamuhis ang nag-unang pagsaka sa koleksiyon sa buhis karong tuiga.

Ang BIR sa rehiyon gitahasan sa pagkolekta og P9.012-bilyones sa tibuok tuig 2006.

Apan masaligon si Santiago nga makuha ug mosobra pa sa maong kota ang ilang makolekta hangtud matapos ning tuiga.

Kini gumikan sa mga programa nga gipatuman karon sa BIR sama sa "Run After Tax Evaders."

Nagpadayun usab ang "No Audit Program" alang niadtong mga magbubuhis nga gikonsiderar sa BIR nga mixed income earners diin wala na ang kahasol sa pagbayad sa buhis ingon nga dili na usab ipaubos sa inspeksiyon ang ilang mga libro.

Nanawagan si Santiago sa mga hingtungdan nga mopahimulos sa NAP nga mapupos karong Hulyo 31.