Gidunggab 47 ka higayon ang sikyo

Kritikal ang kahimtang sa usa ka guwardiya human kini makaangkon og 47 ka samad dinunggaban sa iyang kalawasan nga maoy hinungdan nga dali kining gidala sa Mactan Doctors Hospital sa Basak, dakbayan sa Lapu-Lapu.

Ang panunggab nahitabo ala 1 pasado ang takna sa miaging gabii sa gidestinohan niining establisamento sa JWB Hotel and Restaurant sa barangay Maribago sa dakbayan sa Lapu-Lapu.

Ang biktima mao si Josephus Cogo, 27 anyos, ulitawo, sakop sa Super Merchant Security Agency nga lumad nga taga Dagohoy, Bohol ug temporaryong nagpuyo sa Pusok sa maong dakbayan.

Gitabangan sa pagpanunggab ang biktima sa upat ka wala hiilhing lalaki nga maoy gigamit ang mga dala niining hinagiban nga icepick ug dali usab kining nakasibat pahilayo sa maong dapit.

Dali kining gidala sa Mactan Doctor Community Hospital sa barangay Basak sa maong dakbayan ug anaa kini karon sa higpit nga pag-atiman sa mga doktor.

Si SPO2 Rolito Jumao-as sa homicide section sa kapolisan sa maong dakbayan nga gikahinabi sa Banat News miingon nga nagtuman sa iyang trabaho ang biktima dihang kalit lang mitumaw ang mamumuno.

Matud pa ni Jumao-as nga ang upat ka wala hiilhing lalaki nga pulos naghupot og ice pick ang kalit lang namaregla ug gitabanga'g dunggab ang biktima.

Si Jumao-as miingon nga nagpadayon karon sila sa pagpangita og mga tawo nga nakasaksi sa maong hitabo aron sa pag-ila sa upat ka wala hiilhing lalaki alang sa tukmang pagpasaka nila og kaso sa korte.