Kagubot sa mga mamumuo napakgang

Gipakgang sa konseho sa Mandaue City ang kaguliyang nga mugna sa kadiskontento sa publiko bahin sa giumentong kantidad sa suholan sa mga mamumuo.

Giangkon ni Konsehal Carlo Fortuna sa Mandaue City nga kon wa malipay ang mga mamumuo sa Cebu sa P18 nga giumento sa ilang suhol matag adlaw, ang mga negosyante wa usab malipay niini.

Apan isip tsirman sa komitiba sa pamuo sa konseho, si Fortuna nagkanayon nga gipaningkamotan niyang mahilot ang maong mga suliran.

Matud pa niya nga pinaagi sa maayong liderato sa Mandaue Industrial Peace Council uban sa Metro Cebu Tripartite Industrial Peace Council, wa mosalir ang giplanong kagubot sa mga mamumuo.

Gani may nabati na ang konseho nga plano sa mga mamumuo sa Mandaue nga moalsa ug mowelga sa ilang mga trabahoan, apan gipakgang kini nila ni Fortuna.

Bisan sa bahin sa sektor sa mga negosyante may nadungog usab ang konseho nga mga reklamo tungod kay alang kanila dako ug bug-at rang ihatag sa mga mamumuo kining maong kantidad ilabi na niadtong mga trabahoan nga may collective bargaining agreement nga giintrahan sa tagdumala ug sa mga trabahante.

Dinhi mipakita ang maayong labok o performance ang MIPC pinaagi sa pagpahigayon og miting sa mga hingtungdang negosyante ug mga pundok sa mga mamumuo.

Dihang gipasabot ang matag partido bahin sa desisyon sa Regional Tripartite Productivity and Wages Board, nagkauli sa maayong kabubut-on ang nagkasungi nga mga sektor.

Wala hinganli ni Fortuna ang mga hingtungdan apan gipakita lamang niya nga giatiman pag-ayo sa kagamhanan ang ilang pamatigayon aron labi kining molipang sa kauswagan.