Ebidensiya pagbabag sa probation ni Johna tun-an

Gitun-an karon sa kampo ni Mayor Tomas Osmeña ang mga ebidensya nga gamiton sa himuon unyang pagbabag sa application for probation ni Jonah John Rodriguez ang kanhi kaalyado ni kanhi Mayor Alvin Garcia nga nakonbikto sa kasong grave threats nga gipasaka sa asawa sa mayor nga si Margot.

Nanganti ang mayor nga personal siyang mo-aplay og hold departure order batok kang Rodriguez ngadto sa Bureau of Immigration and Deportation (BID) aron kapugngan kun duna unya kini plano nga molarga sa gawas sa nasud aron sa pagpanarbaho.

Kumbinsido ang mayor nga paboran sa Parole and Probation ang iya unyang petisyon nga magsupak sa aplikasyon ni Rodriguez gumikan kay hisgutan usab sa mayor ang kahasol nga nahatag niini sa ilang pamilya ilabi na sa iyang asawa nga si Margot.

Si Rodriguez gikonbikto ni MTCC Judge Oscar Andrino sa kasong grave threats ug gihukmang mabilanggo sulod sa unom ka bulan ug gipabayad og damages nga mokabat sa P200 mil walay labot ang attorney's fees nga mokabat sa P25 mil.

Kini human mibali ang pinanumpaang pamahayag ni Rodriguez ug mi-plead guilty kini sa kasong iyang giatubang niadtong bulan sa Hunyo human gibiyaan kini sa iyang mga abogado nga si Atty. Kit Enriquez ug si kanhi Mayor Alvin Garcia.

Si Rodriguez gireklamo sa pamilyang Osmeña tungod sa pagpadala niini og mga bugalbugal ug pagpanghulga nga mga text messages gikan pa sa kampanya sa milabay'ng piniliay sa tuig 2001 ug hangtud milabay ang upat ka tuig.

Si Osmeña una nang mibahad nga babagan usab niya kun mangaplay og trabaho si Rodriquez sa mga kompaniya dinhi sa nasud ug kun makasulod man gyud kini og trabaho mohangyo siya sa korte nga sila ang mokobra sa sweldo niini tungod sa P200 mil niining danyos nga bayranan ngadto kanila.