Mi-rape, mitambog sa dagat sa dalagita gipang-kiha na

Nasang-at na kagahapon sa Regional Trial Court ang kasong rape batok sa duha ka lalaki nga gitumbok nga midagit sa usa ka 15-anyos ug usa kanila ang gipasanginlang milugos sa biktima ug gitambog nila kini sa dagat human sa paglugos diha sa Talisay.

Ang mga suspetsado giila nga si Ernesto Labaro, 53, kinsa maoy gitudlo nga milugos sa biktima ug Adonis Dianon, 40, kinsa nagtan-aw dihang gilugos sa iyang kauban ang minor de edad.

Ang duha pulos residente sa Inayawan ning dakbayan.

Human sa maong pagpanglugos gibayongan sa duha ang biktima dayon gitambog sa dagat.

Ang maong insidente nahitabo diha sa usa ka beach resort sa dakbayan sa Talisay niadtong Abril kwatro niining tuiga.

Si Lucy (ngalan gipugngan), taga Labangon niining dakbayan temporaryong nagpuyo diha sa balay sa iyang uyoan sa Inayawan tungod kay nagtrabaho kini isip katabang.

Matud ni Lucy nga milangoy siya paingon sa baybayon human siya gitambog sa duha diha sa dagat.

Mipauli siya sa balay sa iyang uyoan apan pag-abot niya wala diha ang iyang uyoan hinungdan nga mipauli siya sa iyang ginikanan sa Labangon ug gisumbong ang maong hitabo.

Si Labaro ug Dianon mipugos sa pagsakay ni Lucy og traysikol dihang nag-atang kini og jeep nga masakyan para mobisita sa iyang apohan dinhi sa dakbayan ug usa sa mga suspetsado ang mition og kutsilyo sa biktima tungod kay nagdumili kini sa pagkuyog.

Si Labaro gipasanginlan usab nga misagpa kaduha ni Lucy tungod kay nagdumili kini og inom og beer dihang naabot na sila sa beach resort.

Ang maong kaso unang naduso diha sa buhatan ni Prosecutor Marcial Rubia sa Talisay ug gipatubag si Labaro ug Dianon sa pasangil batok kanila apan ang duha wala motubag niini hinungdan nga ang kaso giduso dayon sa RTC.