Polis sa Talisay City mi-torture, nanghinol og suso sa 17-anyos

Polis sa dakbayan sa Talisay gipasanginlang mi-torture ug mihikap sa dughan sa usa ka 17-anyos nga babaye nga dinakpan niadtong Miyerkules diha sa maong dakbayan.

Si KC (ngalan gipugngan) residente sa Talisay mibutyag sa Banat News niadtong Huwebes sa hapon nga gipasanginlan siyang nangawat og cellular phone sa iyang ig-agaw niadtong Domingo sa hapon.

Matud ni KC nga niadtong Miyerkules sa gabii gisikop siya ni SPO1 Glen Burlas uban nila ni PO2 Mikie Espina, PO1 Ingie Piloto uban sa complainant ni KC.

Si KC mipasangil ni Burlas nga gidala siya diha sa buhatan sa Homicide Section sa Poblacion ug aron moangkon siya nga maoy nagkuha sa cellular phone samtang gipusasan siya sa polis gipatiran og katulo ang wala niyang tuhod, misugo sa laing dinakpan nga lalaki nga ipagakos ang biktima apan nakabantay kini ug gipatiran niini ang piniriso nga buot nga mogakos kaniya.

Sa kasuko ni KC giingnan niya ang iyang kauban nga dinakpan nga "hanggaw man diay ka motuo man ka sa sugo anang mga hanggaw." Nasinta si Burlas niini ug gihapak og katulo ang ulo ni KC.

Si KC mipasangil usab nga adunay usa ka lalaki nga outsider ang gisugo ni Burlas pagpakuha og tubig nga gisulod sa botelya sa mineral water gipahigda siya ni Burlas sa lingkuranan nga kawayan nga gitaptapan ang mata og face towel unya gibuboan ang iyang ilong ug baba sa tubig nga gisulod sa botelya sa mineral water hinungdan nga nagpusnga ang biktima ug naglisod sa pagginhawa.

Dungag nga pasangil ni KC nga gipataas ni Burlas ang iyang T-shirt ug gitan-aw ang iyang lawas dayon gikumot ang iyang suso.

Sa kahadlok ni KC sa gibuhat ni Burlas naaghat siya pagmugna og istorya nga iyang gibaligya ang cellular phone.

Si Burlas sa pakighinabi niini sa Banat News kagahapon sa buntag mihimakak sa maong pasangil.

Gitataw ni Burlas nga atol sa pag-imbistigar niya ni KC diha ang ig-agaw niini kinsa maoy complainant lakip na si Inspector Rolando Ong.

Giangkon ni Burlas nga nadungog siya nga manukmag og drayber nga mga badlongon nga iyang masikop nga makalapas sa trapiko apan dili niya madawat ang pasangil nga midapat og minor de edad unya babaye pa gyud kini tungod kay isip polis nakahibalo siya og unsay limitasyon ug mga consequences.

Si Supt. Romeo Perigo hepe sa kapolisan sa Talisay nagkanayon kagahapon sa Banat News nga sila usa usab sa complainant tungod kay ang minor de edad gireklamo kini og pagpangawat.

Gitataw ni Perigo nga gikasabutan nila sa Department of Social Welfare and Development (DSWD) nga ang Provincial Headquarters (PHQ) maoy mopahigayon og imbestigasyon sa maong insidente aron dili sila matawag nga bias.

Kun mapamatud-an nga sad-an si Burlas kinahanglan nga ipaubos usab kini sa due process of law.