Nagwara-wara'g sundang gipusil sa silingan

Patay ang usa ka tiguwang human kini pusila sa iyang silingan sa miaging gabii diha sa Lower Castra Barangay Lahug ning dakbayan.

Ang biktima mao si Artemio Delos Reyes, 68, minyo, nagpuyo ra usab sa maong lugar.

Samtang ang gitumbok nga suspek giila sa kapolisan nga si Rey Macalisang, 28, minyo, silingan sa biktima.

Si P/Ins. Erlando Metante, hepe sa homicide section dihang nahinabi sa Banat News nagkanayon nga sa wala pa mahitabo ang insidente ang suspek nagduwa og mahjong.

Nakit-an sa suspek ang biktima nga hubog ug nagsuroysuroy sa dalan nga nagwara-wara'g sundang. Ang suspek nibiya kini sa mahjongan ug nikuha og armas dayong duol ug gipusil makausa ka higayon tumong sa tiyan ang biktima.

Ang suspek daling nakaipsot palayo sa lugar.

Gidala sa Cebu City Medical Center ang biktima apan gideklarar kining dead on arrival sa mga doktor.

Ang kapolisan sa Cebu City Police Office daling miresponde, pero pakyas sa pagsikop sa suspek nga wala na igkita sa maong lugar.

Ang kapolisan sa homicide nagpadayon pa karon sa ilang pakisusi sa maong insidente.