Illegal structures sa Mandaue idemolis

Gatusan ka mga illegal structures sa nagkalainlaing dapit sa dakbayan sa Mandaue ang gikatakda nga idemolis.

Kini naglangkub sa mga sinumpayan sa mga panimaye nga walay pagtugot sa City Engineering's Office, mga stalls, mga tindahan, mga illegal structures sa mga sidewalks ingon man mga panimaye daplin sa kasapaan.

Ang City Legal Office nipadala na og notice to vacate ug notice to demolish sa mga hingtungdan hinungdan nga pipila niini ang boluntaryo na nga namiya.

Labing daghan nga illegal structures nahimutang daplin sa sapa sa sityo Santa Cruz, barangay Guizo; luna nga giokupar sa Department of Public Works and Highways ingon man ang nahimutang sa sityo Maharlika, barangay Tipolo.

Gawas sa mga nahisgutang lugar, dunay pipila usab nga nahimutang sa may AC Cortes Looc, MC Briones High-way Subangdaku ug Ibabao-Estancia, R.Colina ug SB Cabahug Ibabao-Estancia, AC Cortes Cambaro ug Alang-alang; Basubas, Uniwide ug near Guani Tipolo; FF Cruz, Tribunal Centro, A. del Rosario Mantuyong, Umapad, ilawom sa Marcelo Fernan Bridge, Umapad; Tabok, Treasure Island Cabangcalan ug roadside, Paradise Island, Looc.

Ang paglimpyo sa mga illegal structures gitumong kini sa pagpangandam na alang sa umaabot Asean Summit diin kadaghanan sa mga nahisgutang lugar maagian sa mga delegado.