Lolo nang-hostage

Nasikop kagahapon sa kadlawon ang usa ka apohan kinsa miunay sa pag-hostage sa iyang dos-anyos nga apo dihang nakahibalo kini nga gipasakaan siya og kasong rape tungod sa pag-unay usab niini og lugos sa iyang anak niadtong Martes sa buntag sa Barangay Calalinan lungsod sa Siquijor.

Ang suspetsado giila nga si Ricardo Escobido, 42-anyos residente sa lugar.

Si SPO2 Expidito Cenas, Porvincial Police Investigator sa lungsod mibutyag kagahapon sa Banat News nga si Escobido miunay sa paglugos sa iyang anak sukad niadtong tuig 2003.

Si Escobido ug ang anak niini nanganak og duha apan namatay ang usa ka bata.

Ang asawa ni Escobido ug ang biktima mihukom nga motug-an sa maong insidente sa mga otoridad hinungdan nga ang suspetsado napasakaan og kasong rape sa Regional Trial Court sa Larena Siquijor mga usa na ka buwan ang milabay apan wala pa kini malutsi og warrant of arrest.

Si Escobido nagwala dihang nakahibalo kini nga gipasakaan og kaso sa iyang asawa ug anak ug gi-hostage niini ang iyang apo.

Matud ni Cenas nga gitiunan ni Escobido ang liog sa bata og hunting knife ug gidala sa lasang apan mga alas 10:00 sa gabii sa nahisgutang adlaw giuli ni Escobido ang bata sa amahan niini ug mibiya usab dayon kini.

Ang mga residente sa lugar maoy mitudlo sa mga polis sa nahimutangan ni Escobido hinungdan nga nasikop kini diha sa usa ka payag duol sa balay niini.

Si Cenas midungag nga si Escobido mag-atubang usab og kasong kidnapping gawas sa kasong rape.