Matud pa ni Visayas Deputy Ombudsman Virginia Palanca Santiago nga mahimong ipaagi lang sa telepono o kaha cellular phone niya ug sa ilang opisina ang pagreport.
Mahimong dili mohatag og ngalan ang nagreport basta naa lang ang plate number sa sakyanan, kolor o pintal, lugar, adlaw, petsa ug oras.
Matud pa ni Santiago nga dili mapakyas ang publiko sa tinguna nilang makatabang pagbadlong sa mga abusadong opisyal ug kawani nga mogamit sa sakyanan sa gobiyerno bisan dili na opisyal nga gimbuhaton.
Iyang gihimong ehemplo ang nahitabo kang Cebu Port Area (CPA) Manager Mariano Martinez nga gihusgahan na ni Ombudsman Merceditas Gutierrez ug gisuspenso nga way suweldo sulod sa unom ka buwan.
Kini gumikan kay nasakpan siyang gigamit ang sakyanan sa gobiyerno aron paghakot sa iyang anak nga nag-eskuyla.
Matud pa ni Santiago nga ang mahinungdanon sa matag lakaw ug paggamit sa opisyal ug kawani sa sakyanan nga iya sa gobiyerno kinahanglan may trip ticket siya.
Ang trip ticket maoy magpamatuod kon ang paggamit sa sakyanan may pagtugot ba sa nagdumala sa opisina kay opisyal ang lakaw niini, nga mismo ang mga pasahero mopirma sa maong tiket.
Miingon si Santiago nga sa higayong gamiton ang maong sakyanan nga way hustong mga papeles, ang drayber niini bisan nasayod na siya sa hustong balaod, dili magpanuko ang kagamhanan sa pagpahamtang og silot niadtong malapason.