Tom ok sa P18 usbaw

Kuntento si Mayor Tomas Osmeña sa P18 nga dugang usbaw sa minimum nga suholan nga gipagawas sa Regional Tripartite Wages and Productivity Board (RTWPB) sa mga mamumuo dinhi sa Sugbo.

Giluwatan kining maong pamahayag sa mayor taliwala niining hugot nga pagsupak sa mga mamumuo dinhi sa Sugbo nga gigamyan lang sa maong gihatag nga umento sa sweldo nunot usab ning padayong pagsaka sa presyo sa mga nag-unang palaliton.

Napanglantawan sa mayor nga mosamot kahanap ang kahigayonan nga makakaplag og trabaho ang mga walay trabaho kun padayong mo-umento ang suholan sa mga mamumuo.

Alang kang Osmeña ang labing maayo nga collective bargaining agreement (CBA) mao ang pagpangita og mas dugang oportunidad sa kapanarbahoan aron makuha-kuhaan ang suliran sa unemployment rate dinhi sa Sugbo.

Gipasabot sa mayor nga kanunay niyang giampo nga molambo ang Sugbo ug makabaton og dagkung kita ang mga Sugboanon gumikan kay kun dagko ang kita niini Ug mahatagan og tagsatagsa ka trabaho ang mga molupyo dinhi sa dakbayan mosaka ang koleksyon sa buhis ug molambo ang Sugbo.