Magtiayon gidarok sa van

Patay ang usa ka lalaki ug kritikal usab nga naangol ang asawa niini dihang gidarok sa usa ka delivery van ang duha samtang ilang gisusi ang makina sa ilang multicab diha sa South Coastal Road sa South Reclamation Project kagahapon sa buntag.

Deriyot maputol gumikan sa grabeng pagkaigo sa delivery van ang lawas sa namatay'ng si Lasm Bacus Abaquita, hingkod ang panuigon ug nakabaton usab og grabeng kadaut sa kalawasan ang asawa niining si Milagros, ang duha pulos molupyo sa Tabunok, Talisay.

Ang drayber giilang si Roel Tabriga, hingkod ang panuigon nga taga Magdugo, dakbayan sa Toledo kinsa maoy nagmaneho sa usa ka Isuzu delivery van nga gipanag-iya sa Cebu Overseas Hardware.

Sa imbestigasyon ni PO1 Elmer Degoro sa pakighinabi sa Banat News, ang magtiayon luwan sa ilang multicab nga kolor itom nga may plakang GMX-711 padulong sa dakbayan sa Talisay dihang naaberiya ang makina niini samtang mitadlas diha sa nahisgutang lugar.

Ang magtiayon nanganaog sa ilang sakyanan aron susihon kun unsay problema sa ilang sakyanan. Ang duha diha milili sa luyong bahin sa ilang sakyanan apan dangtan og pila ka segundos kalit nga misampak ang van sa suspek ngadto sa duha ug sa multicab.

Gumikan sa kakusog nangalagpot ang duha lakip na ang ilang multicab og kapin sa lima ka metros. Gikatahong kusog kaayo ang dagan sa suspek sanglit ang skid mark sa brake niini tulo lang kapin ka metros.

Ang suspek kinsa mitahan sa kapolisan human sa insidente mitug-an sa mga tigbalita nga gibana-banang duha na lang ka dupa ang gilay-on niya sa sakyanan sa magtiayon una pa niya kini mabantayi maong ulahi na ang iyang pag-brake.

Ang lalaking Abaquita maoy nagrabehan sanglit mao kini ang nasentro sa pagsampak ug nadaro sa sementadong dalan samtang naipit sa duha ka sakyanan.