Police station di moaksiyon i-text

Giplanohang grupo nga tukoron ni Cebu City Police Office (CCPO) Acting Director Melvin Gayotin nga motubag sa mga reklamo sa text messages sa operations section sa CCPO gamiton usab sa pagpaniid kun moaksyon ba ang mga police station sa mga reklamong ilang ipasa.

Matud pang Gayotin ang maong grupo langkuban og duha ka team nga duha ngadto sa tulo ka tawo nga dunay kaugalingong sakyanan aron gamiton sa pagresponde.

Gumikan sa mga text messages nga di marespondehan sa mga police station matud pang Gayotin nga kinahanglang dunay laing grupo nga mo-counter check niini aron tinuon kung balido ang rason sa kapakyas sa pagtubag sa reklamo.

"Mao ni silay mo-counter check kung unsa kapaspas ug kung moresponde ba ang atong mga police stations, kining atong textline man gud kinahanglang maka-react ta dayon" asoy pang Gayotin.

Hinuon giklaro ni Gayotin nga dunay mga higayon nga dili makaresponde ang mga police station gumikan usab kay dunay gilakaw ang mga nag-duty nga laing mga kaso o ba kaha walay sakyanang magamit.

Sa kasamtangang set-up sa pagtubag sa alarma sa CCPO ang mga ordinaryong alarma respondehan sa Mobile Patrol Group, armadong mga tawo ug pag-serve of warrant of arrest uban sa Warrant Section sagad tulubagon sa Crime Suppression Unit samtang ang mga bomba, engkwentro ug ubang dagkong alarma iya sa Special Weapons And Tactics.