Bomb detection sa Palace of Justice

Mga kawani sa Department of Justice gipailawom sa bomb seminar kagahapon sa buntag sa Cebu Provincial Police Office (CPPO) Bomb Squad diha sa Regional Trial Court branch 9.

Si SPO4 Ceferino Camacho hepe sa Bomb Squad sa CPPO ang mipahigayon sa maong seminar.

Gibutyag ni Camacho sa pakighinabi niini sa Banat News nga si Regional Trial Court Judge Simeon Dumdum ang mi-request nga mopahigayon siya og usa ka adlaw nga seminar sa mga kawani sa korte.

Sa maong seminar ang mga kawani gi-edukar kung unsay ilang mga buhaton kung adunay mga hulga sa pagpamomba ug kung aduna kini makitang bomba aron malikayan ang dakong disgrasya.

Matud ni Camacho nga edukahon usab niya ang mga kawani sa pag-ila sa explosive ug sa Improvised Explosive Device (IED).

Ang seminar naglangkub sa tunga sa adlaw nga lecture ug tunga sa adlaw usab nga pagtudlo sa actual kabahin sa mga klase sa bomba ug mga explosive device.

Usa sa mga gi-demonstrate ni Camacho mao ang vintage bomb, common bomb ug IED lakip na ang mga epekto niini.

Mga 39 ka kawani ang mitambong sa maong seminar nga gilangkuban sa Witness Protection Security sa Office of the Regional State Prosecutor, Hall of Justice sa Lapu-Lapu ug Cebu City.

Kahinumduman nga adunay mga natala sa mga pamantalaan ug sa mga talaan sa otoridad kabahin sa hulga sa pagpamomba diin miresulta sa aksidente tungod kay ang mga tawo nga makahibalo nga adunay bomba sa lugar magkaguliyang man kini sa kahadlok ug dili makamao sa ilang buhaton.