Gibutyag ni Kapitan Danilo Lim sa Pardo nga may tulo na ka buwang wala na ang video carrera game sa sitio Tabuc-canal, Pardo.
Kini dihang gipulihan niyag bag-ong chairman sa peace and order committee ang konseho.
Matud pa ni Lim nga niadtong si Konsehal Emil Dasmariñas pay tsirman sa komitiba nga may labot sa pagpamadlong sa ilegal nga sugal, puwerting kusoga sa video carrera diha sa Tabuc-canal.
Misamot kakusog ang maong sugal ilabi nga si Dasmariñas taga diha sa maong sitio ug wala kaayo tuohi ug tahora sa mga sugarol.
Apan dihang giilisan si Dasmariñas ni konsehal Eli Dumalag, misanong ang mga sugarol ug nahunong na sa hingpit ang maong ilegal nga sugal.
Bahin sa pasangil nga si Lim nagdawatan og payola gikan sa operator sa video carrera, kining tanan lig-ong gipanghimakak ni Lim.
Apan dili nalang siya mokihag kasong libelo tungod kay giangkon man sa usa sa iyang barangay tanod nga si Jimmy Tabura, kinsa gipapha na sa katungdanan, nga siyay midawat sa payola nga balig P2,000 para unta kadto kang Lim.