Tulo nadakpan sa CIIB

Tulo ka lalaki ang nasikop sa kapolisan sa Criminal Intelligence and Investigation Branch ug Philippine Drug Enforcement Agency (PDEA) 7 sa buy bust operation kagahapon sa kadlawon ug sa miaging gabii sa managlahing lugar dinhi sa dakbayan sa Sugbo.

Ang nasikop ni PO3 Cesar Pandong sa CIIB mao sila si Ramil Gonsales, 35, nagpuyo sa Barangay Kamagayan ug Juanito Lunop, 43, taga barangay Duljo Fatima.

Samtang laing nasikop diha sa Sitio Lawis Barangay Pasil ning dakbayan atol sa buy- bust operation sa CIIB ug PDEA-7 mao si Ronald Blanza, 35, minyo, residente sa maong lugar.

Segun sa report sa kapolisan nga sila si Gonsales ug Lunop nakuhaan kinig mga galamiton sa pagsuyop sa ginadiling drugas diha sa ilang tagsatagsa ka panimalay hinungdan nga sila gipangdakop sa mga awtoridad.

Si Blanza giingong usa ka drug pusher sa maong lugar human sa gihimong pagpaniid ngadto kaniya, hinungdan nga gihimo gilayon ang buy-bust operation sa taga PDEA 7 uban ni PO3 Pandong dala ang marked money sa mga polis ug nakuhaan kinig ubay-ubay nga pinutos nga gidudahang ang sulod shabu sa iyang posisyon human dawata sa suspek ang marked money maoy g ibayad unta sa shabu nga gitunol niya sa polis.

Ang tulo kasamtangan karun gitanggong sa bilanggoan sa Cebu City Police Office. Unya sa Lunes ipasaka ngadto sa piskaliya ang kasong paghupot sa ginadiling drugas.