Polis 'gisukmag' og abogado

Usa ka polis ang mireklamong gisukmag sa usa ka gituuhang sakop sa pundok sa mga manlalaban ug piskalya nga higala sa usa ka konsehal sa dakbayan sa Sugbu kagahapon sa kaadlawon diha mismo sulod sa iyang buhatan.

Si Chief Inspector Dirkie Sorronda, 35, ang assistant chief sa Regional Dental Health Unit sa kapolisan dinhi sa rehiyon nga nagbase diha sa Camp Sotero Cabahug mireklamong gisukmag sa usa ka gibana-banang 5'11 nga gitas-on ug tambukon nga lalaki nga nagsuot og maroon nga polo.

Ang maong lalaki gikatahong kauban ni Konsehal Jose "Joey" Daluz ug uban pang gituuhang mga sakop sa piskalya nga kalit lang miabot diha sa iyang buhatan ug sa walay igong hinungdan gisukmag siya niini.

Nianang tungura si Sorronda, Chief Inspector George Ylanan, PO1 Janelle Jonco ug konsehal Daluz gikatahong nag-estorya kabahin sa na-blotter diha sa buhatan sa Family Juvenile and Gender Sensitivity Section dihang kalit nga mibutho ang maong lalaki ug dayong sukmag kang Sorronda.

Si konsehal Joey Daluz sa pakighinabi sa Banat News sa telepono kagabii mibutyag nga dili siya kauban sa grupo sa maong mga abogado ug piskal sanglit igo ra siyang miapas sa maong kampo gumikan sa tawag sa mga piskal.

Matud pa niya nga nagpatabang kaniya ang mga manlalaban gumikan sa giingong kahiwian sa procedure sa paghandle sa mga reklamo.

Gitug-an ni Daluz nga nagsugod kini gumikan sa duha ka gidudahang menor de edad nga mga babayeng nakit-an sa mga piskal sa usa ka imnanan kauban sa duha ka mga Koreyano.

Matud pa gitawgan siya sa mga piskal aron ipakuha sa mga polis ang duha ka babaye. Tuod man gidala sa CCPO, FJGSS (womens desk) ang duha ug aron mawala ang pagduda gipahiling kini ngadto kang Sorronda.

Sa opinyon ni Sorronda bisan walay pormal nga written request gikan kang Ylanan gisusi ni Sorronda kun duna nay third molar nga ngipon ang duha timailhan nga di na sila mga menor de edad, hinungdan nga gipabuhian ang duha.

Matud pang Daluz nakit-an kini og balik sa mga piskal sa maong imnanan maong wala mahimuot ang grupo ug giadto ang buhatan sa kapolisan, diha na usab miabot si Daluz ug Konsehal Jun Pe nga gitawgan usab ni Daluz aron tabangan og alam-alam ang mga piskal.

Si Daluz mibasol karon sa taga Women's Desk gumikan sa pagtugot nga buhian ang duha ka babaye nga wala gani imbestigaha kung dunay mga passport ang mga Koreyano ug kung unsa ka tinuod nga hamtong na ang duha ka babaye.

Matud pang Daluz wala siya makakita nga gisukmag si Sorronda apan mitambag hinuon sa naulahi nga ipa-blotter ang insidente.