Diggings sa Juan Luna nakahasol

Wala makagusto ang kadagkuan sa Citom sa kapakyas sa nagpasiugda og "digging" diha sa Juan Luna avenue pagbalik sa ilang mga kinubkob nga lapok gikan sa karsada nga nakapahasol sa daghang motorista.

Buot ni Citom Executive Officer Arnel Tancinco nga ang nagpasiugda sa digging angay nga silotan kun mamatud-an nga walay katarungan ang ilang kalangan sa pagkuha sa maong mga kinubkob diha sa karsada.

Matud ni Tancinco nga ang mga traffic sign markings nga gibutang diha sa karsada nga mogiya unta sa mga motorista napapas tungod sa gihimong digging diha sa Juan Luna avenue, kanhi San Jose dela Montaña.

Gihulagway sa Citom nga salawayon kaayo ang gihimo sa nagpahigayon sa digging tungod kay wala gani kini mibutang og mga advisory ingon man traffic signs diha sa maong dapit.

Sa milabay'ng mga buwan, dunay digging nga gihimo didto sa Salinas Drive apan matud ni Tancinco nga giuli gyod sa naandan ang karsada nga giguba.

Wala itataw sa Citom kun kinsa ang naghimo sa maong digging apan si Engr. Dionesio Gualiza, ang hepe sa Department of Public Services, gikareport nga mihatag og tagal sa MCWD nga ayuhon nila pagbalik ang karsada sa labing dali nga panahon human sa ilang proyekto.

Matud ni Tancinco nga ang maong proyekto diha sa Juan Luna avenue nakamugna og kahasol sa mga motorsita ilabi na sa tinguwan.

Ang kadagkuan sa Citom namahayag nga ang lagda mao nga ang technical infrastructure committee mopadangat gayod og report kabahin sa mga on-going projects dinhi sa dakbayan.

Ang mga konsehal atol sa ilang sesyon kagahapon miingon nga ang balaod naglatid nga ang mga sakop sa technical infrastructure committee mosumiter lang og report direkta ngadto sa mayor.

Ang Juna Luna avenue usa sa mga karsada nga daghan kaayong mga sakyanan nga moagi.