Collector Belmonte nasurpresa sa bag-ong puwesto

Nasurpresa si Collector Ricardo Belmonte sa bag-o niyang assignment isip collector sa Port of Cebu hulip kang Collector Ma. Lourdes Mangaoang sugod karong Lunes.

Kini ang gipadayag ni Belmonte atol sa interbyu sa Banat News pinaagi sa iyang mobile phone.

Matud pa ni Belmonte nga wala na siya nagplano nga madestino sa Sugbo sanglit toa na siya sa Metro Manila isip collector sa Ninoy Aquino International Airport nga mas daku nga district kaysa Port of Cebu.

Wala masayud si Belmonte kon giunsa siya pagpili isip bag-ong collector sa Port of Cebu sanglit sa sayo pa, duha ang nag-ilog nga madestino sa Sugbo nga sila si Collector Grace Caringal ug usa ka Purita Parojinog.

Kagahapon, gi-turn over na ni Belmonte ang NAIA sa bag-ong collector nga nihulip kaniya aron usab makapangandam siya sa iyang pagbalhin sa Sugbo karong Lunes.

Gipasalig hinoon ni Belmonte sa mga negosyante sa Sugbo ang transparency aron epektibo sa serbisyo ug matagbaw ang mga kliyenti.

Buot usab sutaon ni Belmonte ang mga problema sa Port of Cebu aron makahimo siya og mga lakang nga kini masulbad ubos sa iyang pamunoan.

Giklaro ni Belmonte nga samtang toa pa siya sa Manila, wala pa siya nasayud sa iyang buhaton sa Sugbo sama sa mga kausaban nga ipatuman sanglit wala pa siya makahinabi sa iyang mga tawo sa Sugbo.