7-8-mil ka vendors nag-rally

Syete ngadto sa otso mil ka mga vendors nga sakop sa Cebu City United Vendors Association (CCUVA) misalmot sa gipahigayon nga protesta kagahapon batok sa gitinguha nga halapad nga demolisyon sa ilang mga paninda sa mosunod nga mga adlaw.

Nagsugod ang maong protesta sa may ala una sa hapon diha sa may Tabo sa Banay dayong mibaktas ang mga vendors paingon sa Osmeña Boulevard ngadto na sa Cebu City Hall.

Gibutyag ni Maria Pino, chairman sa CCUVA, malinawon ang mao nilang protesta nga gitumong aron pagpadayag sa ilang baruganan.

Dunay pipila ka mga punto nga gipaabot sa CCUVA ngadto kang Mayor Tomas Osmeña aron malikayan ang demolisyon nga moresulta unya nga kakulban og kapanginabuhian ang mga vendors.

Ang una niini mao nga hatagan sila og 60 ka adlaw ang CCUVA pag-identify sa mga lugar nga gihulagway sa Citom nga nakahatag og kahasol sa sidewalk.

Mipasalig sab ang CCUVA nga usbon ang mga stalls sa mga sakop niining vendors nga nakahatag og kasamok sa sidewalk, obligahon nang magsul-ob og uniporme ug ingon man I.D.

Gipasalig sab diha sa maong position paper sa CCUVA nga giduso nila ngadto sa buhatan sa mayor nga motabang sila paglimpyo sa sidewalk ug pagpahawa sa mga sakop niining vendors nga nakahasol sa mga dapit nga agianan sa mga motorista.

Gipasalig sa CCUVA nga mokooperar sa programa sa mayor sama sa pagsul-ob og Filipiniana nga attire sa mga vendors atol sa Asean Summit karung bulan sa Disyembre.

Nanghinaot ang kadagkuan sa CCUVA nga paminawon og dunggon sa mayor ang mao nilang hangyo aron usab dili mawagtangan og panginabuhian ang mga vendors.