MIPUSIL NI PO3 MAGALSO GIKIHA NA

Nailhan na ug gipasakaan og kaso sa Homicide Section ang tulo ka mga suspek sa pagsuway og pusil patay kang PO3 Allan Magalso niadtong Hunyo 27 diha sa dalan Katipunan, Labangon ning dakbayan.

Dunay tulo ka mga testigos nga mi-execute og affidavit ug miila sa mga suspek nga sila si Noel Gabasa, Welmer Alcontin ug Jennifer Albisa mao ang tulo ka tawong gitumbok nga mipusil kang Magalso.

Si Gabasa gitumbok ni Magalso nga mao ang tawong mipusil kaniya dihang nahinumduman niini pagkabuntag na diha sa Chong Hua Hospital ang panagway niini nga mao usab ang drayber nga midasmag kaniya atol sa ginukuray tali sa kapolisan ug mga PUJ driver sa Mandaue subay usab sa implementasyon sa City Ordinance 1837 nga nagbawal sa mga PUJ gikan sa gawas sa dakbayan sa Sugbu nga mosulod sa downtown.

Giingong gitulisok ug gibaharan siya ni Gabasa sa pag-ingon " Kun impawnon (impound) ninyo akong sakyanan magkamatay jud ta," niadtong higayuna human niya mababagi sa iyang motorsiklo.

Matud pa sa pamahayag ni Magalso nga namay-ungan niya ang mipusil kaniya sanglit wala man magtabon sa nawong si Gabasa kay ang kolor brown nga bonnet niini gilukot kutob ra sa agtang.

Ang pagbawos ni Magalso makaduha ngadto kang Gabasa maoy nakapaaghat sa pag-eskapo niini, dugang pa niini nakit-an usab ni Magalso sila si Alcontin ug ang babayeng si Albiso nga parehong armado nga miikyas.

Ang pamahayag ni Magalso mitakdo usab sa mga testimonya sa laing tulo ka mga sibilyang mitumbok sa mga suspek, usa na niini ang usa ka lalaking mitambong sa haya sa iyang kabanay diha sa punerarya atbang sa gihitaboan.

Matud pa sa maong testigo (ngalan gipugngan) nakit-an niini ang hitabo gikan sa pagbabag ni Magalso ngadto sa usa ka motorsiklo ug pag-abot sa kolor pulang crypton type nga motorsiklo diin ang luwan niini nagsuot og bonnet nga kutob sa agtang ug miduol sa lalaking mibabag sa duha ka nagmotor.

Nianang pagkabuntag iyang gipahibalo ang nakita diha sa kapolisan, samtang laing testigo usab ang mitumbok pinaagi sa litrato nila ni Gabasa nga mao ang tawong magmotor nga iyang nakit-ang kadudahang naniid diha sa ilang dapit.

Duna say testigo nga pasahero sa usa ka PUJ ang nakakita sa usa ka lalaki ug usa ka babayeng pulos dunay armas nga gibitbit nga nagdagan palayo gikan sa Katipunan street human sa sunod nga paka sa buto sa armas.

Nianang pagkabuntag na niya nahibaw-ing polis diay ang gibirahan maong misumbong kini sa Homicide Section sa iyang nakita. Pagka Hunyo 30 giubanan siya sa kapolisan sa ABS-CBN editing room diin gipakita ang video footage sa nahitabong kaguliyang sa trapiko diin si Magalso ug Gabasa nagka-komprontase.

Diha niya makit-i sila si Alcontin ug Albiso sa maong video file ug positibo niyang gitudlo nga sila ang lalaki ug babayeng armado nga midagan human pusila si Magalso niadtong Hunyo 27.

Nagtuo karon si Inspector Erlando Metante sa Homicide Section nga lig-on ang mga pamahayag sa mga testigos batok sa mga suspek.