Dili uyon nga mga tanod isyuha'g armas

Dili tanang opisyales sa barangay mosugot nga magtangkil og armas de fuego ang mga barangay tanod.

Si Kapitan Francisco Pintor sa Kalunasan dakong supak sa plano ni Mayor Tomas Osmeña nga armadohon na ang iyang mga tanod.

Sama kaniya, si Pintor may katarungan tungod kay ang iyang gilantaw mao ang negatibong epekto unya niining armas.

Alang kang Pintor, ang armas de fuego dali kaayong sakyan ni Satanas nga magganoy sa usa ka tawo aron mahimong kriminal.

Maoy hinungdan nga si Pintor sa iyang kaugalingon wa matintal sa kanunay nga pag-agni kaniya sa mayor nga patangkilon og 9mm pistol.

Matud pa ni Pintor nga bisan sa kapeligro sa iyang trabaho tungod kay ang iyang lugar usahay suroyanan sa mga tawong supakero sa balaod, apan wala siya makombinseng magbaton og armas de fuego.

Giuyonan usab kini ni Police Regional Director Silverio Alarcio, kinsa nagkanayon nga kinahanglan bansayon unang daan ang mga tanod sa paggunit og armas.

Kini tungod kay nalantaw sa mga kadagkoan sa kapolisan ang risgo nga giatubang kanunay sa mga tanod samtang nagtuman sa ilang katungdanan adlaw ug gabii diha sa ilang barangay.

Apan matud pa ni Pintor nga nalantawan niya nga kadtong mga tanod nga way problema sa pagkakaron makabaton unya og problema sa panahon nga armado na sila.